احـنـه بيا جنــة ؟00

"مسرحية شعبية  "

 

تأليف : عبد الحسين ماهود

الشخصـــــــــــــــيات
1. الكاهن ( أرنب ضخم )
2. الشعب ( جماهير غفيرة من الأرانب )
3. جنية
4. حية
5. الملك ( الوعل )
6. فاشوش ( أرنب )
7. هاشوش (أرنب )
8. الزنابير
9. دنفش
10. كلب



الفصل الأول

* المشهد الأول *
ساحة احتفالات مملكة الأرانب
الكاهن : ( يقف على دكة بمواجهة شعب الأرانب المتجمهر أمام الدكة بقصد الاحتفال بعيد اله الخصب ) يا اله الخصب
الأرانب : ( يرددون خلفه ) يا اله الخصب
الكاهن : ضاعف في عيدك قدراتنا على الخصب
الأرانب : ضاعف في عيدك قدراتنا على الخصب
الكاهن :حتى نواجه بقوة
الأرانب : حتى نواجه بقوة
الكاهن : ملايين رؤوس الثعالب
الأرانب : ملايين رؤوس الثعالب
الكاهن : التي حان قطافها على أيدي عبادك من الأرانب
الأرانب : التي حان قطافها على أيدينا
الكاهن : يا اله الخصب
الأرانب : يا اله الخصب
الكاهن : انصر نائبك على أرضنا
الأرانب : انصر نائبك على أرضنا
الكاهن : مولانا الملك الوعل
الأرانب : مولانا الملك الوعل
الكاهن : قائد قوات الهيبوليت
الأرانب : قائد قوات الهيبوليت
الكاهن : القادم إليكم الآن
الأرانب : القادم الينا الآن
الملك : ( يظهر مرتقيا الدكة وملوحا إلى الأرانب 0 يقف إلى جانب الكاهن بينما تصفق الأرانب له )
جنية (تهمس إلى حية ) ذوله الأرانب كلهم هيبوليت
حية : منو يكول ؟00
جنية : آني 00لأن مولاهم الملك الوعل
حية : مع الأسف كلهم مشروع للهاديس
جنية : طبعا
حية : يلله جنية 00خلي ندور على اللي روحه عزيزة
جنية : يلله دادة حية ( ينصرفان )
الكاهن : ( يهتف ) عاش الملك
الأرانب : (يهتفون خلفه ) عاش عاش عاش الملك
الكاهن : هذا يوم تأريخي00 نحضى فيه نحن الأرانب 00بلقاء الملك الوعل0في هذه المناسبة المقدسة 00 عيد اله الخصب 00 أيها الأرانب الأشاوس 00 إليكم مليككم المفدى في خطبته التأريخية
الأرانب : ( يهتفون ) عاش عاش عاش عاش الملك
الملك : يا اله الخصب في السموات00كن على الدوام في سرور مادمت أنا نائبك على ارضك0 يا اله الخصب ضاعف قدراتنا على الخصب
الكاهن : ( يقاطعه ) كلناها مولاي الملك
الملك : مومشكلة0 قوي أسناننا وانفخ فينا الشجاعة كي نواجه أطماع الثعالب فينا ( يلتفت إلى الكاهن ) وهاي هم كلتوها ؟00
الكاهن : لا مولاي هذي مالتك
الملك : وإذا اصطدنا من قبلهم 00لاتجعلهم يكسرون لنا أسناننا كي تعيننا في الملمات 0
اله الخصب !00 بارك فرماني بوجوب انخراط جميع أفراد شعبي في الهيبوليت كلا حسب تولده ، وذلك لتعزيز القدرات القتالية لدى المتطوعين والمكلفين والاحتياط في هذا الجيش العتيد ومن يجري خلفه من غير النظاميين
الكاهن : ( يهتف بمفرده ) يعيش الهيبوليت ومن يجري خلفه
الملك : لا يخفى عليكم أيها الأرانب ظلم الثعالب علينا ووقوفهم بالضد من إرادتنا الوطنية في أكل المشمش 0 تلك الفاكهة التي لا تناسب طبيعتكم الشرسة و التي سنحيلها إلى سلاح قريب من أسلحة الدمار الشامل بتحويل نواتها إلى عدة ثقيلة وتروس فخمة ورماح دردارية رغم انف الثعالب الماكرة التي ترغب بافتراسنا 0ايها الشعب الارنوبي البطل00هل لديك الاستعداد لحمل تلك العدة التي سنصنعها من نواة المشمش ونواجه بها مكر الثعالب ونردها إلى جحورها ؟00 قولوا نعم
الكاهن : ( بمفرده ) نعم نعم
الكاهن : هاأنتم إذن عبرتم عن رغبتكم الجامحة في أكل المشمش معي 0 فلنسر إلى الأمام على بركة اله الخصب حتى النصر المؤزر على أعدائنا من الثعالب المارقين
فاشوش : آني ما أحب المشمش
هاشوش : وآني خارج سن الهيبوليت
فاشوش : يلله اشطح هاشوش
هاشوش : يلله فاشوش ( ينسحبان )
أرنب 1: فرارية ( يلحق بهما )
أرنب 2 : جبناء ( يلحق بهما )
الملك : تتناهى لسمعي أصوات نشاز تعلن عن سخطها على أكل المشمش
أرنب 1 : ( يعود ) عاش المشمش
أرنب 2 : ( يعود ) يسقط النشاز
الملك : سآمر زنابيرنا باقتناص ذوي الأصوات النشاز وإلحاقهم بالهاديس ( ينسحب مستفزا ليخلف من بعده ضجة بين الأرانب )
الكاهن : ( يحاول التهدئة ) أيها الأرانب 00اهدأو 0 قشامر00 سيعود الملك لتأديبكم 0 ها قد عاد الملك
أرنب 3 : (بعد أن تخفت الضجة ) وينه ؟00
الكاهن : سيعود ولسان حاله يقول 00ماانتم غير قطيع من نعم 00 من سلط لاءاته عليكم ؟00
ـــ تعتيــــــــــــــــــــــــــــــــــــــــــم ـــ

• المشــــــــــــــــــهد الثـــــاني *
المكان : فضاء مقفر
( تسمع أصوات الفوضى )
حية : شنو هالفوضى ؟00
جنية : الزنابير تسحك روس الارانب0تحوشهم ع التجنيد
حية : يلله00 إرادة ملكية على دم رخيص
جنية : مسكين الهيبولتي ميلحك يحب
حية : شنو يعني 00ناوية تحبيه ؟00
جنية : عوع
حية : وإذا كان الهيبولتي افرار
جنية : الفرار روحه عزيزة
حية : وإذا ؟00
جنية : يعني 00 ينحب
حية : خلي ندور لعد على اللي انسخلوا من القطيع
جنية : على اللي بلعتهم الكاع
ـــ تعتيــــــــــــــــــــــــــــم ـــ

• المشـــــــــــــــــــــــهد الثالـــــــــث *
شجرة في عراء
( فاشوش وهاشوش يركضان بحالة من التعب )
فاشوش : ( يسقط تحت الشجرة مرهقا ) آخ يابه انتهيت
هاشوش : يمعود الزنابير ورانه
فاشوش : لو كورة زنابير متكومني
هاشوش : تره اعيفك
فاشوش : معلي بيك 00روح
هاشوش : واعيفك ؟00
فاشوش : أي 00 لان آني استسلمت
هاشوش : وآني بعد بي حيل 0 ما أريد استسلم للزنابير 0 إلى اللقاء ( يفر )
فاشوش : وداعا ( يستلقي تحت ظل الشجرة ) سواها صدك هذا 00خلاني وحدي وفر 0 بيني وبين الهاديس شمرة عصا0بيني وبينه بس زنبور يوصل لهنا حتى يوديني للهاديس بإرادة ملكية 00 وشلون هاديس هو00 عالم اظلم وأنت كول 0النومة بيه ابدية0 الزنبور إذا لدغ الواحد بالشته ايعيشه ابعز الصيف ، ينكعه بمي جســــمه 0 وإذا لدغه بالصيف يحيله كبل للهاديــــس ( ضجة في الخارج )
فاشوش : ( يجفل ) اجتني الزنابير
صوت زنبور1 : هذا
صوت زنبور 2 : الزمه
زنبور 1 : ( يظهر ) قف
فاشوش : ( يرتجف ) وياي
زنبور 2 : اكو غيرك ؟00
فاشوش : لع
زنبور 1: أنت هيبولتي ؟00
فاشوش : إي ، بس موفرار
زنبور 1: شايل نموذج عدم تعرض ؟00
فاشوش : أي ( يخرج من جيبه ورقة يعطيها إلى زنبور 1 ) تفضل
زنبور 1 : ( يستلم الورقة ويقرأها ) منين صادره ؟00
فاشوش : من وحدتي العسكرية
زنبور 2 : لع صادرة من مريدي
زنبور 1: شلون عرفتها ؟00
زنبور 2 : مبينه
فاشوش: لازنبور لا تظلمني 00 اقراها زين 0 شوف الختمة ، مو ختمة امريدي
زنبور 1 : ( يتفحص جيدا ) هذي ختمة وحدته
فاشوش : دكله لصاحبك
زنبور 1 : ( يلتفت إلى صاحبه ) اعتذر له
زنبور2 : اعتذر 0 بس كلي مشفت هاشوش
فاشوش : ولا فاشوش
زنبور 1 : من أي طريق نكدر نلحكهم ؟00
فاشوش : من هذا الطريق ( يشير لاعلى التعيين )
زنبور 1 : شكرا انت هيبولتي مخلص للملك ( ينسحبان باتجاه الطريق الذي أشار له فاشوش ) إلى اللقاء
فاشوش : إلى اللقاء ياقشامر 00 النموذج هذا صادر من مريدي ومريدي ما عنده ختمة خاصة بيه مريدي سوك يزور نماذج الأجازات وكل المستمسكات الرسمية( يقوم بتمزيق النموذج )

• المشــــــهـــــــــــــــــــد الرابـــــــــــــــع *
البلاط الملكــــــــي
الملك : بصفتك قائد للهيبوليت تكدر تنطينا إيجاز عن سير المعارك بالجبهة ؟00
القائد : لا مولاي
الملك: ليش ؟00
القائد : استحي
الملك : تستحي بس متخاف مني
القائد : بالعكس 0 بس 00 آني محرج
الملك : خلي إحراجك على صفحة 0واوجز
القائد : أمرك مولاي
الملك : يلله
القائد : الطريق نحو النصر على الثعالب شائكة
الملك : شنو دورك إذن كقائد حتى تفك الأسلاك الشائكة ؟00
القائد : الجهد الهندسي بالجبهة قائم على قدم وساق للقضاء على المعرقلات اللي وضعتها الثعالب ابطريقنا
الملك : آني اللي يهمني 00الجهد القتالي للهيبوليت
القائد : مولاي00جهد قائم على وحدة ونص
الملك : الوحدة عرفناها 0 النص شنو ؟00
القائد : النص ممتعض
الملك : فسر
القائد : نص الهيبوليت ما يعتقد ارض المملكة صالحة لزراعة المشمش
الملك : هذا النص مصر على أكل الجزر 0 متآمر ويه الثعالب على إنكار حقنا بأكل المشمش 0 إذا كان أكل الثعالب حيواني 0نص الأرانب ليش ؟00
القائد : آني أكلك ليش 0 الليش مولاي00 يتعلق بأمور صحية
الملك : هيج الثعالب حريصة على صحتنا ؟00
القائد : نعم مولاي
الملك : هذا منطقك وأنت قائد هيبوليتي ؟00
القائد : لا مولاي 0 آني انقل لك لسان حال الممتعضين المثبت ابسجلات استخباراتنا مولاي
الملك : لسان الحال اللي انت تروج له
القائد : لا مولاي 00 لتروح بعيد
الملك : أي ممتعض من الأرانب راح نقبض عليه و انطكه بالدهن
القائد : أمرك مولاي
الملك : وأولهم انت
القائد : لا مولاي 00 آني بريء
الملك : روح اعدم نفسك رميا بالرمح الدرداري 0 بسرعة 0 الهاديس بانتظارك
القائد : أمرك مولاي ( يبكي ) بس آني مظلوم
الملك : مظلوم ؟00وهذي الخزعبلات كلها طلعت من جوه راسك
ـــ تعتـــــــــــــــــــــــــيم ـــ

• المشــــــــــــــــــــــــــــــــهد الخامس *
شجرة التفاح في الحديقة الغناء
هاشوش : ( يستلقي في الحديقة بعد أن أنهكه الركض ) مابي ّ حيل بعد 0لو كورة زنابير ما أتزحزح من مكاني 0اله الخصب يحبني وكعني ابماء وخضراء أوجه هاشوش القبيح ( يتأمل شجرة التفاح ) إيه شجرة التفاح راح تحميني من الزنابير ؟00 ( يتأمل في الأفق ) ماكو وراي زنابير 0يمكن آني اجتازيت حدود المملكة 0 بس معقولة راح أظل وحدي 0 الماء والخضراء يحتاج الها وجه حسن 0 منين أجيبه ؟00زين حتى لو وجه فاشوش00 تذكرته لاخوي00ليش ما أروح أدور عليه0بس منو يكول باقي عدل 0اكيد التمت عليه الزنابير وشالته للهاديس 0 شلون هاديس هو ؟00 اظلم والغيبة بيه أبدية ( يسمع صوت اصطفاق أجنحة 0 يشعر بالرعب ) يا ساتر زنابير ( يتطلع بذعر ) لع موزنابير 00نعامة ؟00 هم لع 0 يمكن حورية 0حورية بجناح00مومعقولة ؟00 نزعت الجناح00نزلت عالمي0صيدة 00 اخطفها00اكمل بيها ثالوثي المقدس00الماء والخضراء والوجه الحسن 0اروح أنكر اجناحها 00 حتى اربطها بي ّ( يزحف محاذرا 0 يجفل عند سماع نعيق غراب 0ينظر إلى السماء ) انجب غــراب ( يواصل زحفه )
ــ تعتـــــــــــــــيم ــ
*المشهد السادس *
العراء
فاشوش : ( يغفو تحت الشجرة )
حية ( تظهر أمامه فجأة ) انهض
فاشوش : ( يستيقظ من النوم مذعورا ) منو 00 زنبور ؟00 لا00لا00 آني موفرار
حية : متفيدنا لعد
فاشوش : انت منو ؟00
حية : آني حية 0 أدور على افرارية
فاشوش : تشتغلين لصالح الزنابير ؟00
حية : لع 0اشتغل ضدهم ؟
فاشوش : لصالح من ؟00
حية : لصالح نفسي
فاشوش: تشغليني وياج ؟00
حية : لع 0 انت متفيدني
فاشوش : ليش ؟00
حية : كتلك آني ما أتعامل وية الهيبوليت
فاشوش : بس آني افرار
حية : لع 00انت هيبوليت 0باعترافك
فاشوش : كذبت عليج
حية : انت متفيدني ، لان آني نقية ما أحب الكذابين
فاشوش :مومشكلة0اروح لحال سبيلي ( يهم بالتحرك ) آني خايف من الزنبور تطلع لي حية 0يلله00 احنه حياتنا كلها جاك الذيب جاك الواوي بقت ع الحية
حية : تعال
فاشوش : ( يختض ) ها
حية : انت شكاعد تلغي ؟00
فاشوش : الشغلة مو يمج
حية : مو ذكرت اسمي ؟00
فاشوش : أي 0انت ارحم من الزنبور 0 لدغة نابج مثل العبوة الناسفة 00تودي كبل للهاديس
حية : يعني انت مشتاق لنابي
فاشوش : لا00مستحيل
حية : لتخاف 00وي نابي متمر بفترة علاج 0لان العلاج عدكم مش ولابد
فاشوش : مدا أفتهم 0 شنو مش ولابد
حية : عبارة مستوردة من أخوتك
فاشوش : اللي وره الحدود ؟00
حية : اللي يغريهم رخص الدم وما تروعهم غزارته من يسيل
فاشوش : اويلي يابه00هلكد المشمش غالي ؟00
حية : كل شي يهون لبطن الملك
فاشوش : إلا دمي
حية : لتغريني حتى احبك
فاشوش : لا يابه لا00مااريد تحبني حية
حية : ليش ؟00
فاشوش : بس تزعل علي ّ تلدغني
حية : وإذا تعاهدك
فاشوش : بكل سهوله تنقض العهد
حية : مع الأسف
فاشوش : ليش تتأسفين ؟00
حية : نابي مزنجر
فاشوش: لا يا صديقة الملك 00تريدين تلدغيني ؟00
حية : آني اكره الملك
فاشوش : لعد ليش تريدين تلدغيني ؟00
حية : لان فتيت كلبي
فاشوش : مو هاي العرفناها 0 شلون تريدين احبج ؟00
حية : أتشاقه وياك
فاشوش : شقاج ثكيل ، ما أتحمله
حية : اعذرني مراح أتشاقه بعد
فاشوش : لازال انت تكرهين الملك 0آني أحب اخدمج
حية :خادم ربك
فاشوش : اله الخصب
حية : يعني مو اله الحرب ؟00
فاشوش : يا اله الحرب ؟00
حية : الهي
فاشوش : يعني أتريدين تكسبيني لآلهج
حية : ما عليك بالآلهة 0الآلهة ميتدخلون بخصوصياتنا
فاشوش : يعني كلمن ابدينه ؟00
حية : كلمن ابدينه
فاشوش : تؤمريني بشي ؟00
حية : لع 0بس أحب أقدم لك نابي سلاح لحمايتك من الزنابير
فاشوش : نابج المزنجر ؟00
حية : مو مشكلة 0احده
فاشوش : آني اقبل ابعرضج واشكرج عليه
حية : لا شكرا على واجب
فاشوش : بالمقابل واجبي شنو ؟00
حية :واجبك 00اتحل مشكلتي
فاشوش : شنو مشكلتج ؟00
حية : آني ما أريد أترمل ابعز شبابي 0مااريد التقي بأي شخص دمه بشيشة
فاشوش :مثلي يعني 00 روحه عزيزة
حية : أعرفك 00هيبولتي افرار
فاشوش : ابخدمتج آني 00 أي واحد يقترن بيج 00راح اشتغل بحمايته 0واذا تريدين حصان هسه اجيبه الج
حية : شاسوي بيه ؟00
فاشوش : الحصان ميخليج تترملين 00 ابقوته وحيويته وسلامته من الأمراض السارية
حية : اي00بس مو حصان
فاشوش : عربيد
حية : العرابيد هم انخرطت بالهيبوليت
فاشوش : اكو عربيد افرار
حية : أي 0 بس ما أريد أتعبك
فاشوش : تعبج راحة
حية : بس آني أكول 00 عصفور في اليد خير من عشرة على الشجرة
فاشوش : ( ينظر إلى الشجرة متفحصا ) ماكو عصافير على الشجرة
حية : لع 00 اكو
فاشوش : نتراهن
حية :اكو مثلما اسمع هسة صوت أنفاس هيبولتي افرار يمي
فاشوش : وينه00اخاف زنبور متنكر ؟00
حية : لتخاف 00جبان
فاشوش : طبعا 00لأن الزنبور ما يعرف غير لغة الهاديس00يطبقها علينا بناء على الإرادة الملكية
حية : خلينا بموضوعنا 0لترجعنا للملك
فاشوش : احجي بصراحة 00 اكو زنبور متخفي ابيناتنا ؟00
حية : آني كلت 00 هيبوليتي افرار مو زنبور 0 ثم انت ليش خايف 0موآني حمايتك ضد الزنابير ؟--
فاشوش : مو نابج بعده مزنجر
حية : هسه احده
فاشوش : لا ارجوج 0 أخاف تلدغيني ؟00
حية : أني عد عهدي الك
فاشوش : آني لازم أنفذ عهدي
حية : يلله 00شمتاني ؟00
فاشوش :راح اخطب الج عريس
حية : بس آني أنخطب مو اخطب
فاشوش:آني راح اخطب مو انت
حية : تخطب من ؟00
فاشوش : أي واحد يعجبج
حية : واحد لو وحدة ؟00
فاشوش : يعجبج تتزوجين من جنسج
حية : لع
فاشوش : لعد واحد مو وحدة
حية : أي واحد هذا ؟00
فاشوش : لا حصان ولا عربيد 0 ممكن يكون 00جريذي
حية : الجرذان وصخة
فاشوش : بوز أبو العرس
حية : لع 0 ليش ميكون00 أرنب ؟00
فاشوش : أرنب ؟00
حية : أرنب 00بس افرار
فاشوش : بس الأرنب ضعيف
حية : ملككم يكول عنكم شرسين
فاشوش : ينفخ بينا
حية : بس انت شجاع 00اتحديت الإرادة الملكية
فاشوش : غصبن عني 0 ما أريد أموت
ــ تعتــــــــــــــــــــيم ــ

*المشـــــــــــــــــــهد الســـــــابع *
شجرة التفاح في الحديقة الغناء
هاشوش : ( يرفع الجناح ) اهم ما بهذا الجناح 00ريحته الطيبة ( يشمه ) خلي أخفيه عن أنظارها (يضع الجناح على غصن التفاح ) فوك غصن التفاح
صوت جنية : لك غراب
هاشوش : ( يجفل )طلعت من الشط 0 ربي ماخلقتني0 لو خامط ملابسها مجان ظليت استمتع بهذا المنظر طول الوكت؟00
صوت الجنية : غراب البين
هاشوش : ( يخفي نفسه ) أخاف تقصدني
صوت جنية : رجع لي جناحي والا00امسح بيك الارض0اضيعك000هاشوش
هاشوش: (يرتعب ) أخ هذي تعرف اسمي0تدري آني خمطت جناحها0من المنادي ؟00
جنية : ( تدخل ) أغاتك
هاشوش : اغاتي الملك
جنية : وآني مو بعينك ؟00
هاشوش : إلا إذا جنت مرة الملك
جنية : آني اهم من مرة الملك 0
هاشوش : ليش مو بعينج الملك ؟00
جنية : مو بعيني لأن اكرهه
هاشوش : ليش تكرهينة ؟00
جنية : لأن يرمل الشابات
هاشوش : يقتل أزواجهن ؟00
جنية : يلبسهم هيبوليت ويحيلهم للهاديس 00اقصد 00للثعالب اللي ماتعرف الرحمة
هاشوش : الثعالب تلعب بيهم شذر مذر
جنية : انت هيبولتي ؟00
هاشوش : بس افرار
جنية : أي 00 اعترف
هاشوش : اعترف 0ليش لا00قابل أخاف منج ؟00
جنية : لا يابوي
هاشوش : انت شنو حتى أخاف منج ؟00
جنية :لو تعرف آني شنو ؟00
هاشوش : موضروري 0واذا شكلتي علي خطورة 00الم عليج كل الأرانب بالمنطقة
جنية : وين اكو أرانب 00كلها بالهيبوليت 0 وبعدين منين يحترموك إذا أنت افرار
هاشوش : بالعكس 0كلهم يحترموني 0 بس بداخلهم ، حتى ليحيلوهم للثرامة
جنية : ليش الهيبوليت مو تحت الثرامة ؟00خالين دمهم بشيشة
هاشوش : يستحيل آني اخلي دمي بشيشة 0آني روحي عزيزة 00أعز من مشمش الملك
جنية : انت شجاع
هاشوش : منو كلج ؟00
جنية : إرادتك قوية0 لان تؤمن بعزة روحك
هاشوش : وأنت؟00
جنية : آني مثلك 0
هاشوش : بس لا تطلعين من زنابير الملك
جنية : انت راسك ناشف
هاشوش : منو يكول ؟00
جنية : بلا لغوة00شوف لي جناحي 00خلي ألبسه وأطير لمملكتي
ــ تعتـــــــيـم ــ
*المشـــــــــــــــهد الثـــــامن *
الشجرة في العراء
حية : هذي مملكتي
فاشوش : تحت هذي الشجرة ؟00
حية : أي
فاشوش : هذي مملكة لو مرصد ؟
حية : مملكة بهيئة مرصد من فوك0وملجأ من تحت
فاشوش : شلون ترهم ؟00
حية : إذا حسيت بحركة موطبيعية اكمن فوك سعفة وارصد المنطقة 0 وإذا الجو طبيعي00اخمد تحت الشجرة بالملجأ
فاشوش :وإذا اقتضت الضرورة للقتال00 منينلج موضع ؟00
حية : آني ما احتاج موضع00لأن طريقتي بالقتال هجومية
فاشوش : طبعا 00لأن نابج غادر0ياريته عندي جان ما خفت من زنبور
حية : أكيد أنت وياي راح تطمئن
فاشوش : أكيد 0بس آني هنا ما عندي ملجأ
حية : شنو رأيك نوسع المملكة حتى تستوعب نفرين ؟00
فاشوش : أي نفرين ؟00
حية : الملكة والملك
فاشوش : واحنه ؟00
حية : احنه الملوك
فاشوش : ما اعتقد احد نصبنه ؟00
حية : منو يعني ينصبنا ؟00
فاشوش : الشعب
حية : لا يا غبي
فاشوش : احترمي نفسج
حية : أنت احترم نفسك 0 هو اكو بالشعب غير الهيبوليت اللي انت شارد منهم
فاشوش : هذا يعني احنه مسوين انقلاب عليهم 0 أمنصبين أنفسنا ملوك غصبن عليهم
حية : بالضبط مثل الملك الوعل القائد العام لقوات الهيبوليت
فاشوش : يمعوده اكلبي صفحة إذا سمع بينا الملك الوعل يودي جلدنا للدباغ
حية : هيج انت تخاف منه
فاشوش : طبعا 0هذا يستمد بركاته من اله الخصب
حية : منو كالك ؟00
فاشوش : تعرف بيه كل الأرانب
حية : الهيبولتية الأغبياء مثلك 0حتى إذا كنت افرار 0كافي عاد 00
فاشوش : انتي هم كافي عاد 00لاملك ولا ملكة 0 كولي أريد أوسع الملجأ علمود يكفي لنفرين
حية : يلله 00مثل ما تريد
فاشوش : عندج نفر ثاني ؟00 أخاف ناوية تفسقين ؟00
حية : آني حية نظيفة ، مؤمنة باله الحرب
فاشوش : ماعندج احد تخونينه ؟00
حية : لا0 بس عندي واحد راح اخلص له ما حييت
فاشوش : وينه ؟00
حية : يمي
فاشوش : يعني قريب منج
حية : أي فلسفها 0
فاشوش : بالعكس آني ما عندي قدرة أفلسف الأمور
حية : طبعا 0 إذا ما عندك قدرة تفهمها شلون راح تفلسفها ؟00ديلله روح جيب فاس
فاشوش : فأس ؟00
حية : علمود توسع مملكتنا
فاشوش : مملكتج
حية : مو بعينك ؟00
فاشوش : مملكتج 00تمدين راسج بيها على كد غطاج
حية : بس راسي ؟00
فاشوش : شلون راس هو 00مايتأمن 00لدغة نابه تودي للهاديس
حية : تريد اقلع الناب ؟00
فاشوش : شلون راح تحرسيني من الزنابير ؟00
حية : ليش تخاف منه لعد ؟00
فاشوش : أخاف فد يوم أفت كلبج؟00
حية : خل يكون سدك أمين 00نابي مزنجر هاالايام
فاشوش : لا لا ؟ 00 طلعتي حية مغشوشة
حية : يعني انت مصر تفته لكلبي ؟00
فاشوش : بالعكس آني مالي عداوة وياج
حية : روح جيب لي فاس
فاشوش : تشكين راسي بيه ؟00
حية : لع 00 أوسع مملكتي
فاشوش : أي مملكة هذي ؟00 مملكة الغش والخداع 0 المملكة اللي تتنكر لأصلها وتموت رعاياها في سبيل تحقيق نواياها الخبيثة اللي يرفضها الواقع0 مملكة تمنع أرانبها من أكل الجزر وتخلط بالمشمش سم يهلك الأرانب من دون مايأثر ع الثعالب من آكلة اللحوم
حية : هذي مو مملكتي 0 انت تقصد مملكة الوعل اللي تتحكم بيكم
_ تعتيـــــــــــــــــــــــــــــــــــــــــــم _

• المشـــــــــــهد التاســـــــــــع *
هاشوش : مكلتي لي من أي مملكة انتي ؟00
جنية : من مملكة عبقر
هاشوش : ( بذعر ) بوية احترك فلمي 0 يا ناس الحكولي 0 يا عالم وين أروح ؟00
جنية : هاي شبيك ؟00
هاشوش : أخاف من عالم الجن
جنية : ليش ؟00 بالعكس احنه هادئين ، نمتلك شفافية
هاشوش : أخاف شفافيتكم هذي تودي كبل للهاديس ؟
جنية : أي هاديس هذا ؟00
هاشوش : العالم الأسفل
جنية : احنه ما النه علاقة بهيج عالم
هاشوش : إذا هيجي 00 يعني اله الخصب يحبني
جنية : ولهذا خلاك تفر من الهيبوليت
هاشوش : منو كلج ؟00
جنية : لا تنسه هاشوش00 آني جنية
هاشوش : وتعرفين اسمي ؟00
جنية : طبعا
هاشوش : أخاف أنت زنبور متنكر ؟00
جنية : لا00 بس يمكن أحميك من الزنابير
هاشوش : معقولة ؟00
جنية : كلش معقولة
هاشوش : وآني 00 لازم أقدم الج شي
جنية : قدم لي جناحي
هاشوش : حتى تطيرين ؟00
جنية : أي
هاشوش : وتخليني ؟00
جنية : لع
هاشوش : تطيرين وما تخليني 0 أي لغة هذي ؟00
جنية : لغة بني عبقر
هاشوش : زين 00شلون افتهمها ؟00
جنية : معليك غير تعبد إلهنا ؟00اله الحب
هاشوش : ما يقبل اله الخصب
جنية : اكلب عليه
هاشوش : وذا اكلبت ؟
جنية : راح احبك ماحييت
هاشوش : شلون ترهم ؟00 حبتك جنية
جنية : ترهم 00بس حصل لي الجناح
هاشوش : حتى تطيرين ؟00
جنية : وآخذك وياي
هاشوش : وين ؟00
جنية : لقصري
هاشوش : اشتعل موظف خدمة ؟00
جنية : لع
هاشوش : حارس ليلي ؟00
جنية : هم لع
هاشوش : حماية
جنية : آني الي أحميك
هاشوش : شتريدين مني بالضبط ؟00 ارجوج لتدوخيني
جنية : انت إللي تدوخني 0 يلله روح جيب جناحي
هاشوش : يلله امشي وياي

ـــ تعتـــــــــــــــــــــــــــــــــــــــيم ـــ

* المشــــــــــــــهد العاشر *

حية : عندك ساطور ؟00
فاشوش : انتهينا من الفأس طلع النا الساطور 0 لعلمج حية 00 آني ضد أي مظهر من مظاهر الإرهاب 0 آني رجل ضعيف مسالم
حية : وإذا اتعلق الأمر بلشة ناكلها آني وياك ؟00
فاشوش : بس آني نباتي
حية : أي 00 اللشة جزرية
فاشوش : إذا تقصدين راس جزر00 الأمر ما يحتاج ساطور
حية : مو مشكلة الغي الساطور
فاشوش : جنابج تاكلين جزر ؟00
حية : علمودك
فاشوش : لا آني ما اقبل
حية : ليش "؟00
فاشوش : إذا صارت أزمة بالجزر آني مامسؤول
حية : منين تجي ألازمة
فاشوش : من أكل الحياية للجزر
حية : يعني أنت ممستعد تضحي من اجلي ؟00
فاشوش : ما اعتقد
حية : جبان
فاشوش :آني الواكف بوجه القوة الغاشمة
حية : أي قوة هذي ؟00
فاشوش : قوة الملك الوعل
حية : وأنت تخاف من زنبور
فاشوش : طبعا 00لان الزنبور بعكس الملك المتربع على عرشه 0 الزنبور متغلل ابيناتنا
حية : تقصد آني زنبور ؟00
فاشوش : موشرط 0 الااذا جنتي صديقة ملكنا
حية : يسقط ملككم
فاشوش : اش
حية : ليش ؟00
فاشوش : للحيطان آذان
حية : وين الحيطان
فاشوش : أي شي ينتصب على هذي الأرض هو حايط
حية : مثليش ؟00
فاشوش : ساق هذي الشجرة
ــــ تعتــــــــــــــــــــــــــــــــــــــــــــيم ــــ
• المشــــــــهد الحادي عشـــــــــر *
جنية : وتالي ؟00
هاشوش : آني تعبت
حية : عيب عليك تتعب
هاشوش: آني موحديد ونار حتى ما اتعب 0 آني أرنب ضعيف
جنية : أسفي عليك 0 جنت ناوية الك نية
هاشوش : سودة ؟00
جنية : لع 0 بيضة
هاشوش : لازم تتعلق بالأمن
جنية : آني ناوية أعيشك 00
هاشوش : فوك النخل
جنية : بمكان لابيه حسد على نعمة ولا تنازع على ملك ولا تنافس على جاه
هاشوش : وين صاير هذا المكان ؟00 الابالجنة
جنية : لا00اقرب للجنة 0 مكان تشيع بيه الغبطة
هاشوش : الغبطة شنو ؟00
جنية : متعرف الغبطة ؟00
هاشوش : الغبطة 00يعني الغطوة مثل البطانية أو اللحاف 0 أو الخمطة بمعنى الخبطة
جنية : عوع00 هذي كلها مفردات ماتعبر عن الفرح الدائم
هاشوش : شنو علاقة الغبطة بالفرح الدائم ؟00
جنية :الغبطة هي الفرح الدائم
هاشوش : منو يكول ؟00
جنية : الرغبة
هاشوش : يعني المزاج ؟00
جنية : الرغبة في أن أعيشك بفرح دائم
هاشوش : أنت ؟ 00
جنية : أي آني 0 موبعينك ؟ 00
هاشوش : لا00بعيني 0 بس منين أجيب الجناح 0 هو جان فوك غصن التفاح 0 أكيد خمطه الغراب
جنية : شنو خمطه ؟00
هاشوش : مفردة نكرية
جنية : يعني ماكو أمل أطير ؟00
هاشوش : حظي هذا
ـــ تعتــــــــــــــــــــــــــــــــــــــــــــــيم ـــ
• المشــــــــــــهد الثـاني عشـــــــــــــــر *
فاشوش : اقلعي نابج
حية : ما أريد
فاشوش : اقلعيه
حية : أنت معليك بنابي
فاشوش : نابج يذكرني بالهاديس
حية :حتى إذا كان مزنجر؟00
فاشوش : منو يكول مزنجر
حية : أطلعه الك
فاشوش : لع ارجوج
حية : هلكد خايف ؟00
فاشوش : من الهاديس
حية : بينما الهاديس يحبكم هواي
فاشوش : أي 0 ما ادري ليش يحبنه ؟00
حية : أكيد الملك الوعل يحرضه على حبكم بدليل يطلق زنابيره عليكم
فاشوش : بالمناسبة 00 ماادري اخوي هاشوش وين صفه بيه الوكت ؟00 احتمال سبقني للهاديس
حية : احتمال
فاشوش : اشكرج
حية : علويش ؟00
فاشوش : على احتمالج
حية : احتمالك مو احتمالي
فاشوش : ليش تأيديني عليه ؟00
حية : ميصير يعني عالواهس ؟00
فاشوش : هلكد الهاديس عدكم رخيص 00 بكل بساطة تكتلين اخوي
حية : إذا كان أخوك راحل للهاديس 00آني ميهمني بيه
فاشوش: يعني أنت مصرة
حية :لا 0 إذا ما عندك رغبة إصر مراح إصر
فاشوش: اكو واحد يرغب برحيل أخوه ؟00
حية :أي
فاشوش : منو ؟00
حية : أنت
فاشوش : لا00انت غلطانة
حية : لتجيب ذكر الهاديس بعد ويه ذكر اخوك0 افتهمت ؟00ارجوك00 انسه الهاديس 0فكر بشغلة غيره 0اذا عقلك ما يستوعب غير الهاديس انطيك شغلة تفكر بيها
فاشوش : أي شغلة ؟00
حية : فكر 00بالجنة
فاشوش : أحنا بيا جنة ؟ 00
حية : الجنة اللي نصنعها بأيدينا
فاشوش: لايابا لا 00شجايب ايدينا على الجنة ؟00
حية : خلي نعودها
فاشوش : ينراد النا عالم سري
حية : ليش ؟00
فاشوش : أخاف الوعل يفكس بينا
ـــ تعتـــــــــــــــــــــــــــــــــيم ــــ
* المشـــــــــــهد الثالــث عشــــــر *

الملك: أوجز سير المعارك يا قائد الهيبوليت
القائد : في جبهتنا مع الثعالب ؟
القائد : نعم
القائد: الثعالب مخادعون أيها الملك
الملك : طز
القائد : متحضرون بأسلحتهم الفتاكة
الملك : طزين
القائد : بينما الطز المفرد والصلي سلاح متخلف يا مولاي
الملك : السلا ح أداة قتل غير متحضرة 0الثعالب إذن يمارسون قمة الهمجية
القائد : مثلما نمارسها نحن تحت ستار أكل المشمش
الملك : احذر 0 كلامك غير معلن
القائد : الحجي بيني وبينك مولاي الوعل
الملك : أحذرك للمرة الأخيرة00 لتزيل الكلفة بيني وبينك
القائد : العفو مولاي 0آني اعترف بأنك الملك المطاع
الملك : وهسة00مراح تحجي الإيجاز ؟00
القائد : لع
الملك : وتعصي أمري ؟00
القائد : لع
الملك: احجي لعد
القائد : احجي00 بس انطيني الأمان
الملك : ميخالف
القائد : مولاي الملك الوعل00 نتيجة المعارك الجارية حاليا مع الثعالب لازالت مخيبة للآمال
الملك : كول غيرها
القائد : ما اكدر مولاي
الملك : سود الله وجهك
القائد : بعدني ما حجيت
الملك : كمل
القائد : عناصر الهيبوليت انبادوا بتأثير نيران الثعالب
الملك : عن بكرة أبيهم ؟00
القائد: إلا شوية
الملك : وين صاروا الشوية ؟00
القائد: جردهم العدو من عدتهم الحربية وسربتهم
الملك : سربتهم ؟00
القائد : ترضه ما ترضه
الملك : سربتهم شنو ؟00
القائد : مفردة من قاموس ألاغاني الحربية
الملك : لا ياجبان
القائد : أرجوك مولاي لتهز معنوياتي
الملك : شيهمني بمعنوياتك بعد ؟00
القائد : ليش مراح تهيكل بقايا الهيبوليت ؟ 00
الملك : ما اعتقد
الكاهن : سأدعو اله الخصب بان ينصر الهيبوليت في الجولة الأخيرة
القائد : بارك لي إذن مولاي
الملك : قداسة الكاهن 00وين صارت دعواتك الأولى
الكاهن : لا تنس جلالة الملك أن لاله الخصب شأن في القتال لا تعلمه الاروحه السامية
الملك : هذا يعني إن دعواتك ما وصلت في حينها
الكاهن : ربما وصلت ولكن ثمة عطل في المركبة الإلهية لم يوصل تبريكات الإله إلى عباده من الهيبوليت وهم يتقلبون في سوح الوغى
القائد : اؤييد ذلك مولاي الملك
ـــ تعتــــــــــــــــــــــــــــــــــــــــــــــــــــــــيم ـــ
* المشـــــــهد الرابـــــــع عشـــــــــــــر *
الشجرة في العراء
عـــــــــــواء كلـــــــــب
حية : ( تجفل ) يمه اجاني العوعو
فاشوش : لتخافين
حية : صوته يعقدني
فاشوش : بالعكس 0الكلب وفي
حية : أي00 بس مو للحية
فاشوش : ولا للأرنب
حية : لتطمئن له لعد
فاشوش : ومنو كلج آني مطمئن له ؟00
حية : عبالي ( الكلب يواصل العواء ) آني رايحة
فاشوش : وين ؟
حية : اجاني الكلب
فاشوش : لتخليني وحدي
حية : شبيدي عليك
فاشوش : يمعودة
حية : الحكني ( تختفي خلف الشجرة )
فاشوش : ليش لا ؟00 ( يختفي خلفها )
دنفش : ( يركض مذعورا )
كلب : ( يلاحقه مستمرا بالنباح 0 يختفيان )
دنفش : ( يظهر بعد فترة وجيزة ) هم زين ما لزمني 00 جان مزقني تمزيق 0 يلله 00( يهتف ) حظ يانصيب 0 يخطي عشرة ومرة يصيب ( يكرر هتافه ) خلي أستريح على ظل هذي الشجرة الوارفة ( يجلس تحت الشجرة ) بس آني لازم اخلص منه 0 ميصير يظل يطاردني على الدوام 0 لازم اسمطه 0 أنعل أبو ابوه0 بس خلي أستريح 0 0نص ساعة 0 نص ساعة بس ( يستلقي على الأرض ليغط في نومته )

ســـــــــــــــــــتـــــــار



الفصـــــــــل الثــــــــــــــــاني


المشــــــــــــهد الأول
شجرة في العراء
دنفش : ( موثق على الشجرة ) آني صياد 00صياد
فاشوش : شتصيد ؟00
دنفش : غزلان
فاشوش : لايامجرم
دنفش: ( بفزع ) مجرم ؟00
فاشوش : إرهابي بحق الثروة الحيوانية
دنفش : وأنت شعليك بالثروة الحيوانية ؟00
فاشوش : مو آني حيوان
دنفش : أنت أرنب موغزال
فاشوش : ماكو فرق 00كلنا في الهوى سوى
دنفش : شنو قصدك00مراح تنطيني حريتي 00مراح تطلق يدي ؟00
فاشوش : مولاتي الحية متقبل
دنفش : عيب عليك تأتمر بأمر الحية
فاشوش : لا موعيب علي 0انت إذا تشوف نابها بسرعة تستسلم
دنفش : لع ما استسلم
فاشوش : ليش ؟00
دنفش : لأن آني صياد
فاشوش : ومثلما تصيد هم تنصاد
دنفش : ها ها ها 00 مثلما كال المثل 00 أنا صياد ورحت اصطاد صادوني
فاشوش : بس أنت دنفش
دنفش : اسمي دنفش
فاشوش : وهذا المثل فضح نواياك
دنفش : أي نوايا منها ؟00
فاشوش : الشريرة 0 اللي راح أنحكمك بموجبها 0ونخلص مجتمع الغزلان منك
دنفش : معقولة تحكمني على مثل شعبي ؟00
فاشوش : المثل الشعبي هنا هو دليل الجريمة
دنفش : إذن آني بريء
فاشوش : ليش ؟00
دنفش : لأن أساسا ماكو مثل شعبي ابهذا المعنى
فاشوش : أنا صياد رحت اصطاد صادوني 0 آني سامعه هذا المثل
دنفش : أي 0بس هو مو مثل 0هو أغنية 0 أغنيتي المفضلة
فاشوش : نفس الشي 0 ماكو فرق
دنفش : لا00اكو فرق 0 آني احتج 0 استأنف0 اطلب التمييز
فاشوش : محد يميز لك بين المثل الشعبي والأغنية
دنفش : طبعا 00 لأن الشغلة بيها إنقاذ من كسران ركبة 0 لوبيها كسران ركبة جان كلمن يمييز من يمه
فاشوش : شوف دنفش 00هذا الحجي ميفيدك 0انت الهاديس طالبك 0 رايدك على وجه السرعة علمود ينقذ الغزلان منك 0ماناقصك غير الحية توقع على قرار إعدامك
دنفش : فاشوش عليك بنفسك 0 مالك علاقة بالغزلان 0 الغزلان تسرح وتمرح بالفلا محد يتعرض الها
فاشوش : غيرك
دنفش : آني أطعمت بيها آلهة الصيد
فاشوش : لو اله الخصب بيها مجال
الحية : ( تظهر ) ليش مو اله الحرب ؟00
فاشوش : أي صحيح ليش مو اله الحرب ؟00
دنفش : لوكية 00كلمن يريدها لإلهه
حية : احترم نفسك لك 0 اعرف ويامن تحجي 0 فاشوش
فاشوش : نعم حية
حية : حضره للشنق
دنفش : على أي أساس ؟00آني ما اعترفت بالجرم المشهود
حية : مجرد اعترافك بمهنتك كصياد يكفي لأدانتك
دنفش : بيا قانون هذا ؟00
فاشوش : انجب ولك 00 بأي حق تجادل الحية بمواضيع قانونية ؟00
دنفش : هي والقانون كجة مرحبة ؟00
حية : يكفي آني رئيسة محكمة مختصة بتجريمك 0
دنفش : آني احتج 0اريد محامي
حية : ميلحك الها محامي بعد 0 أغلقنا ملف القضية
فاشوش : ميبقى غير انعدمك
حية : انتظر اشوية
فاشوش : ليش ؟00
حية : بعدني موقعت على قرار الإعدام
فاشوش : وقعي وخلصينا
حية : ماكو عندي قلم
ـــ تعتــــــــــــــــــــــــيم ـــ

المشــــــــــــــــــهد الثاني
الحديقة الغناء
المؤثر : ( عواء كلب )
جنية : هاشوش
هاشوش : عيون هاشوش
جنية : أنقذني
هاشوش : منين ؟00
جنية : من الكلب
هاشوش : بسيطة 0 كلب ولا ثعلب
جنية : الكلب ارحم ها ؟00
هاشوش : أي ارحم 0 ارحم حتى من الغراب اللي خمط جناحج وحلق بالفضاء
جنية : الغراب خيب آمالك
هاشوش : آني ما عندي آمال 0 ابهيج وقت محد يفكر غير بالأمان
جنية : إذا كان الأمان بعيد عن الواقع ليش ما تروج له بالآمال ؟00
هاشوش : ما ممكن 0الآمال بهذا الظرف مضيعة للوقت ، إذا ما أكول التأمل يشكل خطورة على الحياة 0بدل ما تتأمل شوفلك ملاذ يحرسك من كل أسباب الهاديس اللي تحيط بيك من كل صوب
المؤثر : ( عواء الكلب )
هاشوش : استلمي
جنية : استلم شنو ؟00 كلي وين أروح ؟00
هاشوش : ابتعدي عن أسباب الهاديس
جنية : شلون ابتعد
هاشوش : جددي التزامج بحمايتي من الزنابير
جنية : مقابل شنو ؟00
هاشوش :احميج من الكلب
جنية : آني موافقة
كلب : ( يدخل ) عو عو
جنية : يمه ( يغمى عليها )
هاشوش : لك هاي شسويت ؟00
كلب : كلشي ما سويت
هاشوش : أرعبت الجنية
كلب : جنية بنية 00 شغلتي مو يمها
هاشوش : لعد يمي ؟00
كلب : أنت دنفش ؟00
هاشوش : آني هاشوش
كلب : آني ابحث عن دنفش 0 دنفش فلت مني باعجوبة0 لكن هذا ما يمنع أن اقتل ع الهوية 0كلت أنت فاشوش ؟
هاشوش : لع آني هاشوش
كلب : كذاب 0 طلع هويتك
هاشوش : مشايل هوية
كلب : إذن أنت إرهابي
هاشوش : لايا كلب يا ابن الكلب
كلب : أتشرف بنسبي
هاشوش : آني مو إرهابي
كلب : وين هويتك لعد ؟00
هاشوش : متفيدك
كلب : ليش ؟00
هاشوش : صادرة من مريدي
كلب : أنت هيبوليتي ؟00
هاشوش : فرار
كلب : ربطت
هاشوش : غصبا عليك
كلب :دنفش هم فرار بس مني 0 انطيك شجم دراخما ؟00
هاشوش : مقابل شنو ؟00
كلب : تدليني على دنفش
هاشوش : آني ما اعرف دنفش
كلب : تعرف عليه
هاشوش : ميشرفني
كلب : أنت مبيك خير مثل ( يشير إلى جنية ) صاحبتك
هاشوش : جنية 00 أخاف ماتت
كلب : شوف اسمها اتسجل بقوائم الهاديس ؟00 ( يعوي )
ـــ تعتــــــــــــــــــــــــــــــــــــــــــيم ـــ
المشـــــــــــــــهد الثالث
الشجرة في العراء
المؤثر : ( صوت عواء الكلاب )
دنفش : ( مرعوبا ) يمه
فاشوش : جبان
دنفش : طبعا 0لأن القضية متعلقة بألهة الصيد ومن خلال هذا الكلب ابن الكلب
فاشوش : لتغلط
دنفش : آني ما غلطان 0 هو كلب وابن كلب 0آني ما غلطان
فاشوش : لا يا كلب
دنفش : لتغلط 0 آني مو كلب 0 آني دنفش
فاشوش : إذا أنت دنفش 00شجابك ع الكلب
دنفش : قصة طويلة
فاشوش : إذا تفيدك بالتحقيق احجيها 0وآني كلي آذن صاغية
دنفش : أحجيها 00بس على شرط الحية تسمع
حية : تسمع وتسجل
فاشوش : يلله
دنفش : آني صياد
فاشوش : لا00انت دنفش
دنفش : دنفش الصياد 0 ولتقاطعني رجاء
حية : خليه يحجي فاشوش
فاشوش : أي بس ما اقبل يخربط
دنفش : منو اللي يخربط 00آني لو أنت
فاشوش : حية تحكم
دنفش : أكيد راح تحكمني بالإعدام
حية : القضية تتوقف ع المحضر
دنفش : تنقذني منكم آلهة الصيد على الرغم من أمرها بإلقاء القبض علي من قبل الكلب المشؤوم
هاشوش : مو كلنا لا تغلط
حية : استرسل
دنفش : لما كلبي00
هاشوش : هذا اللي يعوي
دنفش : أي
هاشوش : كمل
دنفش :لحك غزال
هاشوش : بالفلا ؟00
دنفش : حتى حدود المنتجع
هاشوش : فسر
دنفش : عبر الغزال الشارد مني أسوار منتجع معبودتي ألهة الصيد
هاشوش : أي 0يعني أنت تعبد ألهة الصيد ؟00
دنفش : ليش عندك مانع ؟00
هاشوش :أي 0 بس الديمقراطية 00
حية : هاشوش 00 لتكلب مسار التحقيق
هاشوش : العفو حية 0 أي استمر
حية : لتزور باعترافي 0 بينت نواياك الخبيثة
هاشوش : هذا اتهام باطل
حية : اتهام مشطوب
دنفش : طبعا 0 أثنينكم علي ّ
هاشوش : استمر
دنفش : ما اكدر
هاشوش : ليش ؟00
دنفش : انقطعت سلسلة أفكاري
حية : اربطها له
فاشوش : حية هذا منتفع بعبادته لألهة الصيد لأنه بالأساس صياد ، بينما أنت ممنتفعة من اله الحرب ولا آني انتفع من اله الخصب لأن نتيجة الخصب دائما بصالح زيادة عدد الهيبوليت المحصودين على الدوام بإرادة اله الحرب
دنفش : لتكيل التهم جزافا 0 آني مطلوب لألهة الصيد حاليا
فاشوش : شنو وجه الطلب ؟00 يجوز ناوية تكرمك ؟00
دنفش : مستحيل
فاشوش : فسر
دنفش :من تهبط ألهة الصيد من السموات تروح كبل ع المنتجع
فاشوش : واحنة شعلينا 0 وبعدين منو خلاك جاسوس على الألهة ؟00
حية : أصغي له فاشوش 0خلي نفهم شنو القضية
فاشوش : أمرج حية
دنفش : لتروح تنكطع سلسلة أفكاري مرة ثانية
فاشوش : احجي براحتك مراح أقاطعك
دنفش : شأحجي ؟ 00
حية : كمل
دنفش : شكمل ؟00
حية : ذكره فاشوش
فاشوش : آني هم نسيت
حية : كله منك 0ليش تقاطعه ؟ 00
فاشوش : العفو حية مراح أقاطعه بعد
حية : خلي يحجي لعد
فاشوش : احجي
حية : أنا صياد ورحت اصطاد صادوني
حية : كلتلك احجي مو غني
دنفش : ليش الغناء حرام ؟00
حية : أنت بوضع ميفيدك الغناء بيه
دنفش : لا آني لازم اغني
فاشوش : ليش لازم ؟00
دنفش : اغني احتجاجا على الوضع اللي آني بيه
فاشوش : متخاف من الهاديس 00 تحجي بلغة الاحتجاج ؟00
دنفش :اي00 آني ما أخاف من الهاديس
فاشوش : تصلح تكون انتحاري
دنفش : على شنو انتحر ؟00
فاشوش : على شي يسوه
دنفش : ماكو شي يسوه
فاشوش : ما تسوه 00ان تفكر آلهة الصيد بيك ؟ 00
دنفش : علمود تعاقبني ؟00
فاشوش : أنت شمسوي ؟00
دنفش : تذكرت 00 من تهبط الهة الصيد من السموات 00تروح ع المنتجع
فاشوش : وحدها ؟00
دنفش : لع وياهه حمايتها الحوريات
فاشوش : جميل جدا 00 الحوريات
دنفش : لتزيغ عالحوريات
هاشوش :ميخالف00 رطب الجو شوية 0 ولو آني مشايفهن
حية : بس عايز تشوفهن
هاشوش :مو مشكلة حية أشوفهن أو لا 0المهم لتشكين بمشاعري
حية : اشطب أي شك من المحضر
هاشوش : شطبنا
حية : استمر دنفش
دنفش : خليني ويه الحوريات ارجوج
فاشوش : احترم نفسك احنه مو بالمنتجع
دنفش : منتجع ألهتي 0 أنت شعليك ؟00
حية : أحنه بمحضر تحقيق
دنفش : ارجوج حية 0 صحيح آني بمعتقل 00 ميصير شوية استغرق بذكرياتي
حية : طبعا ميصير 0لأن ذكرياتك تأجج بداخلك روح التمرد علينا 0مما يضطرنا أن نسرع بتجريمك
دنفش : آني ممسوي شي لألهتي0 كلما هنالك00 من عبر الغزال أسوار المنتجع ، وأثناء زيارة الألهة للمنتجع أمرت بصلخ الغزال وإعداد وجبة غداء دسمة الها من لحمه 0وبدل ما تعتقل الكلب 00اطلقت سراحه مقابل تثقيفه ضدي
فاشوش : يعني الكلب مثقف ضدك ؟00
دنفش : أي
فاشوش : وشنو الهدف من الثقافة هذي ؟00
دنفش : إلحاق الضرر بي
فاشوش : وإلحاقك بالهاديس ؟00
دنفش : فورا
حية : إلحاقك بالهاديس راح يتم من قبلنا
فاشوش : انتو هم مثقفين ضدي ؟00
حية : أي بس مو من الهة الصيد
دنفش : منين لعد ؟00
حية :؛ من الكلب
دنفش : شنو علاقتكم بالكلب ؟00
حية: راح نفدي بيك حياتنا المهددة منه 00هذا الكلب ابن الكلب
فاشوش : حية
حية : نعم فاشوش
فاشوش : خلي نتداول
حية : يلله ( يتنحيان جانبا )
فاشوش : حية 00خلي نطلق سراحه
حية : ليش ؟00
فاشوش : ماكو بجيبه ولا دراخما
حية : متأكد ؟00
فاشوش : أي 0 إذا سمع بيه احد راح يكول عنه00 مخطوف بلا فدية
حية : يعني هو مكادر يفدي نفسه بشجم دراخما ؟00
فاشوش : أي
حية : واحنه أصدرنا قرار بإعدامه ؟00
فاشوش : أي بس منكدر ننفذه بدون ما توقعين عليه
حية : روح ابحث لي عن قلم
فاشوش : آسف 0 احنه بجو ما يتعامل بس وي الإرهاب
حية : خلي نستخدم الإرهاب ضده
فاشوش : شلون ؟00
حية : نعدمه بلا قلم
فاشوش : يلله
حية : دنفش
دنفش : نعم حية
حية : ذكرت بمحضر إفادتك بان الهة الصيد ثقفت الكلب ضدك
دنفش : أي
حية : تعتقد ليش ؟
دنفش : ما اعتقد
حية : باعترافك ؟00
دنفش : لع 0 الكلب من اخترق حواجز المنتجع الأمنية00 اعتبرته الالهة محرض من قبلي
حية : يعني اتهمتك بالتحريض لقلب نظام حكم ألهة الصيد ؟00
دنفش : يمكن
فاشوش : لا بل أكيد
حية : ولهذا فان إعدامك أصبح واجبا و تقربا لالهة الصيد
دنفش : لوكية
حية : فاشوش 00اقفل المحضر
فاشوش : قفلته
المؤثر : ( صوت عواء الكلب ) عو عو
دنفش : يمه انعدمت
ــ تعتــــــــــــــــــــــيم ــ
المشــــــــــــــــــــهد الرابع
الحديقة الغناء
المؤثر : ( عواء الكلب يستمر )
جنية : ( مرتعبة ) يمه
هاشوش : لتخافين جنية
جنية : هذا كلب 00شلون ما أخاف ؟00
هاشوش : كلب مو ثعلب 0 وبعدين هو كلب عابر
جنية : عابر سبيل ؟00
هاشوش : بالضبط
جنية : يعني راح ؟00
هاشوش : أي راح
جنية : مراح ينبح علينا ؟00
هاشوش : منو يكول علينا ؟00
جنية : أكيد شافنا ونبح
هاشوش : بس إحنا مشفناه
جنية : من خوفنا 00ضمينه نفسنا عنه 0 طبعا هذا كلب
هاشوش : أي00 كلب مو ثعلب 0 لو كان ثعلب جان صلخ جلدنا وما عافنا إلا وإحنا بجوفه
جنية : جوفه شنو ؟00
هاشوش : يعني بداخله
جنية : تقصد بمشاعره وأحاسيسه ؟00
هاشوش : ارجوج 00لتخلطين الأوراق 0 إذا أنت تكولين ما أعير أهمية للمشاعر والأحاسيس 00شتكولين ع الثعلب 00 يؤمن بهيج خزعبلات ؟00
جنية : لعد شنو داخله ؟00
هاشوش : يعني بطنه
جنية : تقصد يعلسنا ؟00
هاشوش : ويبلعنا
جنية : كلي ثعلب هم يعلس ع الهوية ؟00
هاشوش : لع00 الثعلب يعلس حامي شامي
جنية : ليش ؟00
هاشوش : يعتبر الكل أعداءه
جنية: بس احنه ممسوين له شي
هاشوش : ادري
جنية : ليش يعتبرنا اعداءه ؟00
هاشوش : أي كائن حي ضمن الجغرافية اللي يحتلها يعتبره عدو بغض النظر
جنية : بغض النظر عن شنو ؟00
هاشوش : أي شي
جنية : شنو يعني أي شي ؟00
هاشوش : يعني أي شي
جنية : أنت ابد متفتهم
هاشوش : أحسن
جنية : ليش أحسن ؟00
هاشوش : لأن مشايف بحياتي هيج جنية غبية
جنية :غبية 00لأن ما اهتم بالمشاعر
هاشوش : لا يمكن أن تكوم الدنيا وتكعد على مشاعر وحدة جنية
جنية :مو كتلك آني ما اهتم بالمشاعر
هاشوش : أحسن
جنية : ولا بالأحلام
هاشوش : أحنة بزمن ما بيه أحلام وردية
جنية : بس احنه اللي نحلم بيه00 برمشة عين يصير واقع
هاشوش : احلمي لعد بزمن مابيه ثعالب ولا كلاب أو زنابير
جنية : ما اكدر
هاشوش : ليش ؟00
جنية : هذي مسألة تتعلق بالأقدار
هاشوش : طيب 00احلمي بحبج اللي
جنية : ليش ؟
هاشوش : مناوية فد يوم تحبيني ؟00
جنية : إذا كنت ناوية فد يوم 00هسة استثنيت
هاشوش : ليش ؟00
جنية : عالمكم كله ثعالب وكلاب وزنابير
هاشوش : اجتثيني من هذا العالم
جنية : شلون أوصلك لمملكتي ؟00
هاشوش : رجعنا لنقطة البداية
جنية : تقصد00 الجناح
ـــ تعتـــــــــــــــــــــــيم ـــ
المشــــــــــــــــــــــــهد الخامـــس
البلاط
القائد: الثعالب
الكاهن : تقهقرت ؟00
القائد : ياريت0
الكاهن :أنبادت عن بكرة أبيها
القائد : لع 0 الثعالب اهتدت لجحر الملك الوعل0 طلعت الملك منه وهو في حالة يرثى لها
الكاهن : أيعقل ذلك ؟00
القائد : يعقل قداسة الكاهن 00 ليش لا ؟00
الكاهن : وماذا حدث بعد ذلك ؟00 هل افترسته ؟00
القائد : لع 0خلته في قفص يتفرج عليه العامة في حديقة الحيوانات
الكاهن : سقط نظام الملك الوعل إذن
القائد : مو عيب 00يسقط وآني موجود ؟00
الكاهن : مو انقلب جريذي ؟ 00
القائد : مو مشكلة
الكاهن : الله وأيدك 00 شراح تسوي ؟00
القائد : راح اكلب عن اله الخصب
الكاهن : ليش ؟00
القائد : ما نصر مولانا الملك الوعل على القوم الكافرين بيه 0 توجه بإكليل العار و ساعد الثعالب حتى تسرح وتمرح بالمملكة
الكاهن : راح تعبد أي اله ؟00
القائد : أنت اقترح
الكاهن : الإله اللي راح اقترحه 00هو اللي راح تتوج ببركاته
القائد : أي
الكاهن : دخلني إذن دورة
الكاهن : دورتيش ؟00
الكاهن : دورة أتعلم بيها تلاوة الدعاء الخاص بالإله الجديد لنصرة مولاي الملك الجديد
القائد : ادخل دورة المياه إذن 00حتى تتغوط
ـــ تعتيـــــــــــــــــــــم ـــ
المشهد السادس
الحديقة الغناء
حية :قررت المحكمة بعد استئناف حكم الإعدام الصادر بحق دنفش 00 استبدال هذا الحكم بالبراءة لعدم كفاية الأدلة المقدمة ضده
دنفش : هيه
فاشوش : اش00 ولك 0 خلى حية تنتهي من قراءة الحكم الصادر بحقك وجاهيا وحسب الأصول
دنفش : يعيش الوجاهيا
حية : شريطة أن 00
دنفش : ميخالف اللي أوله شرط آخره نور
حية : شريطة تنظيف جيوبه من الدراخمات
دنفش : آني احتج
فاشوش : ليش تحتج ؟00
دنفش : آني ما بجيبي ولا دراخما
حية : على أن يستأنف الحكم مرة أخرى 0 لعدم وجود الدراخمات لديه ، من اجل تنفيذ حكم الإعدام بحقه كما جاء قبل أي استئناف
دنفش : خلصوني قشامر 0 لتضلون تلعبون على أعصابي 0آني راح أموت
فاشوش : طبعا راح تموت لأن الهاديس طالبك
حية : خلي يهدأ هذا الحيوان 0 خلي ينطينا فرصة نناقش مصيره
دنفش : أي مصير هذا ؟00 انتوا مو حددتوه ؟ 00
فاشوش : أي حية 0 قريتي قرار الحكم وانتهى كل شي
حية : زين 0 لازم احد نابي 00علمود الدغه
فاشوش : روحي حديه 0 شمتانيه ؟
صوت هاشوش : ( ينادي ) فاشوش
فاشوش : ( يفاجأ ) أخوية هاشوش
هاشوش : ( يدخل ويتجه لفاشوش كي يعانقه )
فاشوش : ( يعانقه )
هاشوش : ما توقعتك عدل ليهسه
فاشوش : آني هم
هاشوش : ( يلقي نظرة على حية ) وما توقعتك متزوج
فاشوش : نسيت أقدمها الك 00 حية
هاشوش : (يجفل ) فاشوش 0 حبتك حية ؟00
فاشوش : لا لا 0 بعدنا على أولها (يلقي نظرة على جنية التي قدمت خلفه ) مو مثلك
هاشوش : أقدم لك جنية
فاشوش : هاشوش 00 كول غيرها تالي عمرك تحب جنية
هاشوش : ياريتني فاشوش 0 بس هي رافضتني
فاشوش : لازم تتمضيّك
جنية : أخوك مسؤول عن ضياع جناحي 0لوبس يلكيه الي 00يعيش بغير جو
فاشوش : لا لا آني ما أريده يعيش بغير جوه
جنية : شلون جو هو 00موبوء
هاشوش : معرفتونا بالاخ 00ليش مجتف ؟00
حية : محكوم بالإعدام
هاشوش : أكيد إرهابي
حية : أنكس
هاشوش : شنو جريمته ؟00
حية : ما عنده شجم دراخما يخفف بيهن الحكم
هاشوش : لا يا مسكين
جنية : هاشوش 00 هو هذا دنفش
هاشوش : دنفش ؟00 معقولة
دنفش : أي معقولة 0 هم جايين انتم علمود تبتزوني ؟00
هاشوش : ياريت 0 أنت قضيتك جبيرة
دنفش : شمسوي آني ؟ 00
هاشوش : اسأل الكلب اللي جاي ورانه
دنفش : يمه 00 هدوني 0 راح يجيني اللي يوديني صدك للهاديس
حية : راح يجي الكلب ؟00
هاشوش : أي نعم
حية : آني راح اكلب ( تهم بالهروب )
جنية : آني هم ( تهم بالهروب )
فاشوش : آني هم
هاشوش : لع 0 انت تبقى
فاشوش : ليش ؟00
هاشوش : عندي حسبة وياك 0 بس هده هذا المسكين
فاشوش : ( يفك قيد دنفش )
دنفش : آني مو مسكين 0 آني دنفش الصياد 0 آني صياد ورحت اصطاد (يحل وثاقه ) هدوني ( ينطلق هاربا )
المؤثر : ( صوت نباح الكلب يقترب بسرعة )
فاشوش : ( يهرب أمام نباح الكلب ) آني هم راح أكلب
هاشوش : (ينادي به ) فاضل
الكلب : ( يخطف نابحا ومتجها صوب الهاربين )
فاشوش :منوجردني من الخوف ؟ 00
هاشوش : آني 0 نزعتك جلد الأرنب
فاشوش : أنت هم نزعته ؟00
هاشوش : أي
فاشوش : أنت يعني 00هاشم ؟ 00
هاشوش : بالضبط
فاشوش : احنه يعني 00 أقوى من الكلب
هاشوش : والثعلب
فاشوش : وكل ذوله اللي شفناهم بالمسرحية ؟ 00
هاشوش : أي
فاشوش : تدري ليش ؟00
هاشوش :أي 0 كل اللي شفناهم هنا حاولوا بغباء أن يرسمون النا خارطة طريق ما تعنينا 0مستغلين ضعفنا كأرانب
فاشوش : من وجهة نظرهم
هاشوش : ومن وجهة نظرنا 00احنه نزعنا جلد الأرانب
فاشوش : أصبحنا ناس تبحث عن جنة حقيقية

ســــــــــــــــتـــار النهــــــــــــــــــــاية
 

ahmahood@hotmail.com